Fanm ki sibi zak vyolans pa dwe nan kache, nou dwe pale byen fò pou nou denonse zak la ak tout agresè a. Poukisa tout moun ap pale de vyolans kap fèt sou fanm kòm vyolasyon dwa limanite epi tout fanm ki sibi zak la deside fè silans ? Pawòl Nayka, yon fanm 30 lane ki te sibi zak sa yon fwa nan vil.
Indeed Gabriel
Selon OMS daprè etid ki te fèt en 2013, nan mond lan yon fanm sou twa viktim zak vyolans fizik oubyen seksyèl. Li enpotan pou nou edike popilasyon se pa selman fi pou konn le li sibi zak vyolans, men tout moun alawonnbadè pou yo ka konnen ki konsekans vyolans ka genyen sou lavi yon moun.
Vyolans se itilizasyon fòs oubyen pouvwa li kapab fizik ou mantal pou ka destabilize, touye oubyen kontrenn yon moun fè yon aksyon ki pa depann de volonte li.
Li kapab pran divès fòm ; sak enpotan se konn kouman pou detektel e koupe sik vyolans lan. Genyen vyolans fizik, vyolans konjigal, vyolans ekonomik, e vyolans k ap fèt sou fanm pati ki enterese nou nan atik sila.
Sosyete patriakal la fè konprann fanm se yon èt ki fèb emosyonèlman depi w destabilize l li pa gen pyès pwisans ankò. Vyolans kap fèt sou fanm se yon abi pouvwa pou rann fanm lan vilnerab epa pwodiktif paske pou kèk moun nan sosyete a fanm reprezante yon menas.
Vyolans kap fèt sou fanm manifeste sou twa fòm jeneralman vyolans fizik, seksyèl ak sikolojik.
Kisa vyolans fizik la ye ?
Li anglobe anpil zak tankou baton, kout pwen, brile, mòde oubyen tout zak ki ka atenn yon moun fizikman, ki ka pote domaj lakay li. Se sak fè edikasyon ak sansibilizasyon enpotan anpil pou nou kwape zak sila, nou tout gen dwa pou nou alèz nan menm anviwonnman san ke nou youn pa reprezante yon danje pou lòt.
Kisa vyolans seksyel la ye ?
Se tout tantiv ki itilize pou rantre nan relasyon seksyel ak yon moun san konsantman li endepandaman de relasyon ki konsenè viktim lan. Li gen yon konsekans grav sou sante fizik ak sante mantal viktim lan.
Kisa vyolans sikolojik la ye ?
Li difisil pou rekonèt tip vyolans paske li fèt sou plizye fòm, objektif la se brize entegrite ak diyite viktim lan. Li ka gen yon gwo enpak sou devlopman pèsonel viktim lan. Se atak ak move pawòl, kritik, entimidasyon, elatriye.
Tout fanm ki sibi vyolans pa gen menm konpòtman, genyen ki vin konprann ke lavi pa gen sans, genyen ki vin agresif pou yo ka pwoteje tèt yo, genyen ki pote blesi a pou lavi, yo vin difisil pou fè moun konfyans e konpòtman sa fè yo vin tonbe nan depresyon. Lè konsa byennèt jeneral yo afekte.
Ann nou pale medam vwa nou konte pou chanje kominote n ap viv, si nou pa denonse agresè yo y ap two alèz pou kontinye destabilize nou pa tout mwayen pou pwouve nou yo gen pouvwa.
Mwen pa ka sibi vyolans sou kontèks ke se mwen ki te antò, swa mwen fè patenè mwen fache, mwen gen bel kò, visaj mwen atiran, oubyen mwen te abiye twò sexy. Se dwa m pou m viv lavi m jan sa fè m plezi, se dwa m pou m egziste nan tout entegralite m, pyès nan sa m sot site la yo pa bay yon moun dwa atenn mwen sou nenpòt fòm. Se bazik sa nou dwe konnen antanke fanm.
Medam ann aprann konstwi fanm ki gen kouraj, detèminasyon, ki konnen dwa li ak devwa li e ki konprann enpak deklarasyon l genyen pou kwape zak sa k ap wonje sosyete nou an jouk nan zo. Ansanm an n fè vwa nou fè yon sèl pou nou jwenn plas nou nan sosyete a san prejije.
Nou pap wont se yo ki pou wont, nou pa responsab si nou viktim, ann denonse yo, pou nou kwape zak vyolans kap fèt sou fanm sou tout fòm.
Indeed Gabriel
Yon videyo pou gade
Discussion à propos de post