Se wè m wè m la

RHJS ap pwopoze w An n ri pou n pa toufe. Yon ribrik komik ki sòti nan emisyon Byennèt. Sou paj sa, w ap jwenn tèks aktè Rezo jounalis ayisyen lasante yo jwe. Epi nan pye tèks la ou kapab viv, nan vwa aktè yo, sèn nan.

Mezanmi an n ri pou n pa toufe.

Mako : Kòman w ye?

Niva   : M la…. Mwen la!

Mako : Kòman w la a?

Niva   : M wè m la…. Mwen wè mwen la.

Mako : Kòman w wè w la a?

Niva   : Eske se pa konsa nou ye? Nou wè nou la. N ap gade.

Mako : Mwen pa konprann ou menm maten an. Kòman figi w frijèt frijèt konsa?

Niva : A! m te gen pou m te pati kite peyi a, depi mwa pase a. Aewopò fèmen sou mwen la. Se wè m m wè la.

Mako : Aewopò gen pou l ouvè. Li gen pou l ouvè. Bon jan ouvè. Tann, tann, tann.

Niva : Tann, tann, tann! Ou pa wè yo fèmen pò a sou nou tou. Kisa pou yo tann pou nou ankò?

Mako : Yo pa tann pou nou ankenn chita tann. Fòk nou rete tann. Se tann pou n tann. Jan mizik la di a : fòk nou gen kouraj pou n tann.

Niva  : Kouraj pou n tann, pou nou rive pase tan an.

Mako : N a rive. An n pase tan an, konsa nou ka pran bon eskanp, pou n byen kanpe, pou n fè fas kare ak tan an.

Niva  : M pa ka kanpe ankò. Mwen sou jenou m la. Mwen sou jant, Mako. Aewopò fèmen. Pò fèmen. Wout yo fèmen. Pòtoprens fèmen nan tout twou l. M tounen yon vye rat. Ou pa wè peyi a fèmen sou nou la! Ayiti fennen, deplimen, an tenten anba sendenden.

Mako  : Sese te di sa. Sese te di : Sosyte a fè yon pitit, li bliye se li k fè l. Pitit sosyete a tounen pou sosyete a. Li tounen pou l ba l batistè, okipe l kòm sa dwa.

Niva : Sa w ap di la, Mako?

Mako  : M ap divage. M ap delire. Mwen deliryòm. Fòk mwen ta fè yon vakyòm nan tèt mwen pou m konprann lòm. An sòm,  an n gad lespwa.

Niva  : Mwen pa nan lespwa. M bwè pwa. M bezwen pati, Mako. M bezwen pati, pati. Si yon van te ka bwote m, li t ap mennen m pi lwen lakay. Ou wè si m tonbe malad la, mwen pa konn sa m ap fè?

Mako  : Valè remèd fèy ki gen nan peyi sa? Se sa lespwa wi. Ou pa wè lopital ap fèmen? Ou pa wè famasi ap fèmen? E si tout doktè ale? Si tout pati kite peyi a, kisa n ap fè?

Niva  : N ap mouri. N ap mouri, Mako.

Mako  : Non! Nou pap lage kadav kò nou nan fènwa dezespwa; n ap lage kò nou rèd nan medsen fèy. N ap retounen nan lakou, n ap remete demanbre nou yo sou pye. N ap lage tout kò nou, n ap lage tout tèt nou nan jèn, n ava fè penitans pou nou delivre anba tout vye maladi ki vle mete do nou atè. Men sa k lespwa a, Niva. Men sa k bon jan lespwa a. Nou lèd, nou la. Nou la pi rèd, menm si nou vin pi lèd. N ap jwen èd kanmèm. Kanmèm.

Niva  : Ou radote twòp nan tèt mwen. Twòp radòt k ap fè m sòt. Mwen Niva, pati m bezwen pati.

Mako  : Va! Niva. Pati, pati. Pati!

Niva  : Mako, m pa chen, tande. Ou pa ka di m pati.

Mako  : Rete! Niva, tèt ou pati?!

Niva  : Ou di m pati.

Mako  : Ou pa vle pati?

Niva  : M vle pati. Bon jan pati.

Mako  : Ou bonjan pati. Pati. Pati, pati Niva. Va, vas-y.

Niva  : Anaaaan…

Claude Bernard Sérant

serantclaudebernard@yahoo.fr

Nan videyo Byennèt sa, RHJS ap envite w tande, nan yon wòl, vwa : Marc-Herley Fontal ak Claude Bernard Sérant

Eske w konnen lè w ri li bon pou sante w? An n klike sou videyo sa.