Se avèk kè sere Rezo Ayisyen Jounalis Lasante (RHJS) aprann lanmò Liliane Pierre-Paul, youn nan fondatè epi direktris pwogramasyon Radyo Kiskeya, ki kite nou jou ki te 31 jiyè 2023 a.
Kiyès ki pat konn Liliane Pierre-Paul? Kiyès ki pat rekonèt travay san pri Liliane Pierre-Paul t ap mennen nan peyi a, kèlkeswa kote li ta kanpe a?
An Ayiti, katrè se lè Liliane Pierre-Paul. Lili se te mèt katrè nan peyi Dayiti, yon senbòl angajman pou libète laprès, pou dinyite ak byennèt moun. Menmsi Liliane pa pataje menm lide avè w, l ap ba w pale nan Radyo Kiskeya.
Nou koube nou byen ba devan kokennchenn fanm sila. Yon moun ki te kwè nan bon jan enplikasyon jènn, sitou jèn fanm nan metye jounalis la an Ayiti.
Yon fwa ankò, ak kè sere, RHJS voye tout senpati li bay fanmi, zanmi, Radyo Kiskeya, kòporasyon jounalis la yo, popilasyon peyi Dayiti ak tout moun separasyon sila afekte kèlkeswa kote li ye nan mond la.
Liliane, ou te byen travay, ou ka pati ak kè poze ! Travay la ap kontinye!
Dèlma, 2 dawout 2023
Pou RHJS,
Gladimy Ibraïme
Sekretè jeneral
Discussion à propos de post