Tèm referans
Kontèks
Nan mwa dawout 2022, Unicef antreprann yon patenarya ak Rezo Ayisyen Jounalis pou Lasante (RHJS). Paternarya sa a te fèt nan lide pou reyalize yon kanpay kominikasyon ki pote non «Campagne de communication multimédia sur la vaccination et les pratiques familiales essentielles ». Pami aktivite ki te prevwa nan kad kanpay sa a, te gen yon defi (challenge) sou TikTok ki gen pou wè ak lasante, sou sante timoun.
Koze sante timoun yo nan tèt lis, pami divès lòt traka k ap sakaje sistèm sante peyi a. Chif ki disponib yo klè sou sa. Daprè yon ankèt ki pote non EMMUS IV(2018), sou chak 1 000 timoun ki fèt, 59 ladan yo mouri avan yo gen yon lane. Selon menm ankèt la, sèlman 41% timoun ki gen mwens ke de lane rive pran tout vaksen li ta sipoze pran.
Apre aspè sa yo, gen koze maltrete timoun nan, koze malnitrisyon an, koze timoun ki ekspoze a bagay ki pa apwopriye pou laj yo san konte timoun ki pa al lekòl. Tout bagay sa yo gen efè sou sante mantal ak fizik timoun yo epi anpeche yo byen grandi, byen devlope.
Konkou sa a, k ap fèt pandan n ap detann nou, envite itilizatè TikTok yo pou yo fè yon videyo ki prezante yon mizansèn sou jingle « Ti moun yo », yon mizik ki veyikile mesaj ki lye ak sa paran yo dwe fè pou kenbe timoun yo an sante. Mizik la abòde plisyè aspè nan zafè sante timoun yo: nitrisyon, vaksinasyon, planin, ijyèn elatriye. Patisipan yo lib pou mete aksan sou aspè yo pi pito pami sa ki trete nan mizik la.
Mizik : Timoun yo.
Hashtag : #SanteTimounYo
Medyòm: Yon ti videyo ki pote mesaj sou sante timoun. Mizansèn nan ka fèt atravè dans, mim, sketch, teyat, montaj sou yon fòma pedagojik ou nenpòt lòt fòm ki ka fè pase mesaj ou vle pase a. Nou bay plas pou kreyativite.
Dire videyo a: Videyo a ka gen menm dire ak mizik la kise 1 minit 53 segond. Konsa tou, enterese yo ka pran yon ekstrè nan mizik la pou fè videyo a. Si se yon ekstrè, li pa gen dwa pi piti pase 45 segond.
Dire chalenge lan : Soti 17 avril pou 1e Me a midi. Vòt ki fèt aprè dat sa a pap kontwole. Aprèsa, RHJS ap kominike ki dat l ap fè seremoni pou remèt pri yo e se nan seremoni sa a n ap konnen gayan yo.
Jan yap deziyen gànyan yo:
Chwa gayan yo ap fèt an 2 pati. Dabò, n ap chwazi 10 videyo ki fè plis enpak sou TikTok yo, sa vle di ki touche plis moun. Men kòman kalkil la ap fèt: Like = 1 pwen; komantè = 2 pwen; Pataj = 3 pwen. Pou komantè ak pataj yo, n ap konsidere itilizatè inik.
Aprèsa, yon jiri ki gen 3 moun ap analize videyo 10 finalis yo pou detèmine kiyès ki gayan. Jiri a ap analize videyo yo selon kritè sa yo: èske videyo an respekte sijè nou an, èske mesaj li a pètinan, èske videyo a pa gen pwoblèm etik oubyen èske li pa pote atent a dwa moun, kalite teknik ak estetik videyo, epi si moun nan kreyatif.
Gayan yo : ap gen 5 gànyan. Men y ap konsidere 10 moun ki fè plis enpak sou TikTok yo pou final la e tout finalis yo ap sòti ak yon prim.
Premye pri : 25 000
Dezyèm pri : 20 000
Twazyèm pri : 15 000
Katriyèm pri : 10 000
Senkyèm pri : 5000
NB : Senk premye gànyan yo ap jwenn lòt prim ankò epi 5 lòt moun ki fè plis nòt yo ap jwenn prim konsolasyon.
Kijan pou moun patisipe :
- W ap ranpli fòmilè pou enskri nan konkou a ki disponib la.
- W ap abòne a kont TikTok RHJS la : @rhjshaiti
- W ap pibliye videyo ou fè a sou pwòp kont TikTok ou (apati 17 avril) ak hashtag #SanteTimounYo epi lè ou fin pibliye li, w ap voye lyen an pou nou sou nimewo whatsapp sa a 3832 2925. NB: Ou ka ranpli fòmilè a (enskri) depi lè ou wè l la pou jis rive 28 avril 2023.
Moun ki ka patisipe: Fòk moun nan ap viv ann Ayiti. Si yon moun pa ko gen 18 an, paran li ka ranpli yon fòmilè otorizasyon pou li.
Kantite moun pou videyo a: Yon sèl moun ka fè videyo a, konsa tou plizyè moun ka fè li ansanm. Si se plizyè moun ki fè li sansanm, gwoup la ap deziyen yon moun pou enskri. Epi, nan ka gwoup la ta sòti pami gayan yo, yap pataje sèl pri (ak prim) nan.
NB : Remiz pri a ap fèt Pòtoprens. Si ou pami 10 finalis yo men ou pap viv Pòtoprens, se ou k ap responsab deplasman ou. E si ou pa ka deplase se ou ki ap responsab pou ou fè rekipere pri a pou ou.
Pou tout lòt enfòmasyon ekri sou nimewo whatsapp sa a : 3832 2925.