Ey kòk !
Kòk kalite
Kòk bon ras
nou konn bay gabèl
nou pa konn bay legen.
Doktè Ernst Mirvil, alyas Pyè Banbou.
Doktè Ernst Mirvil, alyas Pyè Banbou, manm fondatè « Mouvman Kreyòl ayisyen/Sosyete Koukouy » nan 1965, prezidan konsèy elektoral Ayiti pandan de (2) fwa, tonbe nan rezidans li jou ki te sis (6) avril 2021 an, yo kouri lopital Notredam avèk li. Se yon lopital ki sou wout Frère. Gran kouzen an, ki limenm malad depi ditan, pa twò anfòm. Sitiyasyon sa a, se yon apse sou klou nan sa ki gen a wè ak sante grandèt la. Malgre tou, chak manm nan sosyete a, rete kwè grenn limyè sa poko ka etenn.
Selon Monik, fanm ki reponsab pou pran swen li a, li klè doktè Mirvil te malad depi yon bon bout tan. Nan lane1980 yo, li te sibi yon chòk nan kad travay li kòm prezidan konsèy elektoral peyi Ayiti, e tout sa ta pral fè yo pati ak li pou peyi letranje, kote nan moman an li te jwen swen nesesè.
Mayi a griye se pou sila yo ki gen dan, yon pawòl ki toujou ret kenbe doktè a nan wonn sant lavi a, menmlè gen yon move van dezespwa ki kontinye ap souke peyi li. Li klè doktè Mirville se yon gwo ekriven Kreyolis, lengwis, powèt, nouvelis epi tradiktè. Li te kolabore ak jounal Le Nouvelliste, kote li te pase yon seri atik sou metrik kreyòl. Li se yonn nan moun ki te pran inisyativ tradui kont Lafontaine yo an kreyòl.
Piplis toujou, doktè a se yon ansyen pwofesè nan fakilte etnoloji ak plizyè fakilte nan pòtoprens lan. Nan mwa oktòb 2020 an, Biwo Santral Sosyete Koukouy te rekonèt travay doktè Mirville avèk yon Pri Ekselans nan Lengwistik. Te gen 2 etidyan Fakilte Lengwistik Aprlike (FLA)ki te resevwa Pri a. Non yo se: Louisnet Nicolas epi Fegens Paul. Tout travay ak onè sa yo fè pwofesè a gen yon pase gloriye. Yon gran nanm, yon pase djougan. Youn di lòt, nan dinamik pou rete konekte epi konsève tout sa Desalin nan ye, e tout sa li ap kontinye ye pou nou, doktè Ernst Mirville (Pyè Banbou) se yon rasanblè, yon vizyonè, yon teyorisyen.
Pou Sanmba Dede Dorcely ak plis pase 80 lane, mapou branch Koukouy Ayiti a, ki kontinye ap kenbe flanbo koukouy la pi wo, limyè Sosyete Koukouy ap pwopaje toupatou a se moso nan souf enèji Pyè Banbou.
Frantzley VALBRUN (Konpè Konsèy),
Manm Sosyete KOUKOUY Ayiti