Pòtoprens, 21 avril 2020
Rezo ayisyen jounalis pou la sante (RHJS) ak Asosiyasyon jounalis ayisyen yo (AJH) enkyè anpil pou jan otorite nan leta yo ap jere lit kont maladi Kowonaviris la nan payi a.
19 mas 2020 – 19 avril 2020 : yon mwa depi otorite yo nan leta a te anonse premye ka maladi Kowonaviris la nan peyi Dayiti. Se nan menm jou sa tou leta Ayisyen te deklare eta ijans sanitè nan tout peyi a.
Yon mwa apre, RHJS ak AJH konstate, ak gwo kè kase, kijan kantite moun ki trape maladi a ap grenpe chak jou.
RHJS ak AJH konstate tou, leta pa rive aplike ak fè respekte anpil nan desizyon li te anonse pou fè fas kare ak pandemi sa a.
Yon mwa apre, aksyon moun ki reskonsab nan leta a poko janm klè sou ki sistèm ki mete kanpe pou bay swen ijans ak moun ki riske trape maladi a pa pil ak pa pakèt, jan nou wè sa fèt nan lòt peyi.
Jodi a RHJS ak AJH konstate leta pa ka fè respekte mezi ki mande popilasyon an chita lakay li ak mezi 2 pa distans la, sa yo rele distans fizik la.
RHJS ak AJH poko vrèman wè gwo distribisyon mas leta te anonse a. 2 asosyasyon yo konstate tou jiska prezan leta poko klè sou yon pwotokòl ki defini fason pou trete malad Covid19 yo, ni sou jan pou antere moun ki mouri anba maladi a.
Malgre tout fay sa yo, pandan moun ki malad yo ap ogmante, se nan moman sa gouvènman an chwazi relouvri faktori. Sa ki depaman ak yon seri mezi leta mande pou ki respekte nan kad batay kont maladi Kovid 19 la.
Nan sans sa a, konsòsyòm RHJS-AJH la ap mande pou:
– Leta fèmen tout aktivite ki ka rasanble moun epi re-evalye desizyon pou relouvri faktori ki pa nan fabrikasyon materyèl medikal yo
– Leta asire l, nan mache piblik yo, devan bank komèsyal yo (pou n site sa yo sèlman) mezi 2 pa distans la respekte ant moun ;
– Leta ale pi vit nan distribisyon mas bay popilasyon an nan tout peyi a, sitou bay moun ki pi vilnerab yo (mache piblik, estasyon machin, chofè moto, nan bidonvil ak bò kote peyizan yo, elatriye) ;
– Lopital piblik nan chak depatman andan peyi a, gen kapasite pou fè tès epi bay swen ak tout moun ki gen maladi Kovid19 la ;
– Leta asire pwoteksyon tout pèsonèl medikal yo nan tout peyi a.
Jounen jodi a, maladi Kovid 19 la ap pran teren nan peyi a. Pazavan nou rive nan fen mwa me, nou poko ka konnen kote nou gad. Se poutèt sa, RHJS ak AJH ap kontinye mande leta pran reskonsabilite l pou l pwoteje tout popilasyon kont maladi sa a.
Dr Odilet LESPÉRANCE
Sekretè jeneral RHJS
3661 6565
Jacques DESROSIERS
Sekretè jeneral AJH
3727 8539
Discussion à propos de post