Pa gen maladi Ebola an Ayiti, se sa direktè jeneral Ministè Sante piblik la, Doktè Laure Adrien, konfime nan yon radio nan kapital la.
Selon sa DG a rapote, gen yon moun ki soti Repiblik demokratik Kongo, yon peyi ki gen maladi a ki ateri nan ayewopò Potoprens. Moun sa a ki te gentan kite èpòt la, ajan MSPP yo tal rejwenn li lakay li pou egzamine l. Dokte Adrien pousuiv pou l di sitwayen an pa gen siy maladi a men MSPP mete yon miss sou li pou kontwole l.
Li fè konnen Ebola se yon maladi ki gen alèt mondyal sou li, depi yon moun sòti nan yon peyi ki gen maladi a, fòk yo tyeke l san pou otan di moun nan genyen l.
N ap raple Ebola se yon maladi mòtel a plis pase 50%. Li pran orijin li nan bèt, e lè moun pran l, li rive transmèt moun a moun apati de tout sekresyon ki nan kò a tankou kontak san, etenye, touse, swe, pipi elatriye.
Maladi Ebola a pran 2 a 21 jou pou l parèt. Siy maladi a se : fatig, fyèv, doulè, tèt fè mal, gòj fè mal. Apre sa moun nan vin gen vomisman, dyare, bouton ak tout siy maladi ensifizans renal ak fwa ka bay. Li bay tou emoraji jansiv ak andedan kò.
Pou moman sa a maladi sa prezan sitou nan Afrik wès kote te gen yon ogmantasyon nan ane 2014 pou rive 2016.
Discussion à propos de post